ပုံစံ၇ (အတု အစစ်) စစ်ဆေးလို့ရနိုင်မဲ့နည်းလမ်း

ပုံစံ၇ (အတု အစစ်) စစ်ဆေးလို့ရနိုင်မဲ့နည်းလမ်း

မေး။ ပုံစံ (၇) ဟာ ပေါင်နှံရောင်းချခြင်း၊ ငှားရမ်းလဲလှယ်ခြင်း၊ ပေးကမ်းခြင်းတွေ လုပ်လို့ရလာတဲ့အတွက် အတုပြုလုပ်ပြီး တလွဲအသုံးချနေတာကို မကြာခဏကြားရပါတယ်။ ကိုယ့်လက်ထဲရောက်လာတဲ့ ပုံစံ (၇) အတု၊ အစစ်ကို ဘယ်လိုစစ်ဆေးလို့ရမလဲ။ ဘယ်မှာ စစ်ဆေးလို့ရမလဲ။

ဖြေ။ ပုံစံ (၇) ပေးတဲ့ လုပ်ထုံးလုပ်နည်းက တော်တော် ရှုပ်ထွေးပါတယ်။ ရက်ပေါင်း ၁၀၀ကျော် ကြာပါတယ်။

ပုံစံ ၁
ကို ကျေးရွာမှာ အခမဲ့ဖြန့်ဝေပါတယ်။ ဒါကို တောင်းပြီးလျှောက်ရပါတယ်။ လျှောက်ကတည်းက ပုံစံ (၁)မှာ နာမည်၊ ဘယ်ကမြေဆိုတာက ပါပြီးသားပါ။ နောက် ကန့်ကွက်လွှာကို ခေါ်ပါတယ်။ နောက်တဆင့်

ပုံစံ ၃
မှာ လုပ်ပိုင်ခွင့် လျှောက်တဲ့သူတွေ တန်းစီပြီး မှတ်ပုံတင်ထားတာပါ။ ဘယ်သူတွေက၊ ဘယ်မြေတွေကို လျှောက်လဲဆိုတာ ထပ်တင်ရပါတယ်။ ပုံစံ ၁ မှာပါတဲ့သူတွေကဟာ ပုံစံ ၃ မှာဆက်ပြီး မှတ်ပုံတင် (Register) သွင်းရပါတယ်။

ပုံစံ ၄
က အစီရင်ခံစာပါ။ ဘယ်သူက၊ ဘယ်မြေဧက၊ ဘယ်ကမြေ၊ စစ်ဆေးတွေ့ရှိချက်က ဘယ်လို ဆိုတာတွေ စစ်ရပါတယ်။ နောက် မြို့နယ်မြေစာရင်းက စစ်ပြီးရင် မြို့နယ်လယ်စီရဲ့ သဘောထားမှတ်ချက်နဲ့ ခရိုင်လယ်စီ ဆီပို့ပါတယ်။ ခရိုင်လယ်စီက ကြည့်ပြီးတော့ ပေးသင့်၊ မပေးသင့် ဆုံးဖြတ်ပါတယ်။ ခရိုင်လယ်စီက ခွင့်ပြုတယ် ဆိုရင် မြို့နယ်မြေစာရင်းဌာနကို အကြောင်းကြားပါတယ်။ ပုံစံ (၇) ခွင့်ပြုတဲ့ စာပေါ့။ ဒီအကြောင်းကြားစာရမှ မြို့နယ်က

ပုံစံ ၅
ဆိုတဲ့ မှတ်တမ်းကြီးမှာ မှတ်တမ်းတင်ရပါတယ်။ အဲလိုမှတ်တမ်းတင်ပြီးမှ မှတ်ပုံတင်ကြေး ၅၀၀ ပေးရပြီး ပုံစံ (၇) ထုတ်ပေးပါတယ်။

*** ဒါကြောင့် ပုံစံ (၇) ရဖို့ဆိုရင် ပုံစံ ၁ မှာလည်း အမည်ပေါက်ရမယ်။ ၃ မှာလည်းပါမယ်၊ ၄ မှာတစ်ခါပါမယ်၊ ၅ မှာ လည်း ပါမယ်ပေါ့။ ပြီးမှ ပုံစံ (၇) ဖြစ်တာပါ။ ဒါကြောင့် ဒီပုံစံတွေမှာ နာမည်မပေါ်ပဲနဲ့ ပုံစံ (၇) တစ်ခုတည်းကိုင်ထားရင် (၇ မှာပဲ နာမည်ပေါက်နေရင်) ဒါက တရားမဝင်ပါဘူး။
နောက်ထပ် စိစစ်နိုင်တာတခုက ကျေးရွာမှာ ...

ပုံစံ ၁၁
ဆိုတာရှိပါတယ်။ အဲမှာ ပုံစံ (၇) ရသူတွေကို မှတ်တမ်းတင်ထားပါတယ်။ နောက်တခုက ပုံစံ (၇) ပွားနေတာက မြေယာမှုခင်းဖြစ်တယ်။ ကျေးရွာမှာဖြစ်တယ်။ နောက်မြို့နယ်ကို တက်လာတယ်။ တက်လာပြီဆိုရင် ပုံစံ (၇) ကို အဲဒီအဖွဲ့ကို အပ်ရပါတယ်။ တိုင်းအဆင့်ဆုံးဖြတ်ပြီးမှ ပြန်ပေးရပါတယ်။ လယ်သမားကလည်း ဒါလေးကိုပေါင်စားတော့ မအပ်တဲ့အခါမှာ အမှုကိုဆက်စစ်ပါတယ်။ တိုင်းဒေသကြီးပြည်နယ်အဆင့်က ဒါကို အပြီးသတ်ဆုံးဖြတ်ပါတယ်။

*********************************

*** ဆုံးဖြတ်ပြီးရင် နာမည်ပြောင်းပေးရတော့မယ်။ ရှုံးတဲ့သူကလည်း ပုံစံ (၇) လာမအပ်ဘူး။
*** မအပ်ရင် နိုင်တဲ့သူကို အသစ်ထုတ်ပေး ရပါတယ်။
*** ရှုံးတဲ့သူလက်ထဲမှာရှိတဲ့ ပုံစံ (၇) သည် တရားမဝင်ကြောင်း စာထုတ်တယ်၊ ဖျက်သိမ်းတယ်၊
*** လယ်စီအဆင့်ဆင့်ကို ပို့တယ်။
*** သက်ဆိုင်တဲ့ စိုက်ပျိုးစရိတ်ချေးတဲ့ ဘဏ်တွေအဆင့်ဆင့်ကို ပို့တယ်။
*** အုပ်ချုပ်ရေး အာဏာပိုင်တွေကို ပို့တယ်။

*********************************

ဒီတော့ မူလ ရှုံးထားတဲ့သူဆီမှာလည်း ပုံစံ (၇) ရှိတယ်။ နိုင် တဲ့သူဆီမှာ လည်းပုံစံ (၇) ရှိတယ်။ မူလ ရှုံးထားတဲ့သူဆီမှာလည်း ပုံစံ (၇) ကတရားမဝင်တော့ဘူး။ ဒါကို အတု လုပ်ပြီးရောင်းစားနေရင် အတုလားအစစ်လားဆိုတာ ကျေရွာမှာကပ်တဲ့ နို့တစ်စာ (Notices) တွေရှိမယ် ၊ နောက် သက်ဆိုင်ရာလယ်စီတွေမှာစုံစမ်းရင် ရနိုင်ပါတယ်ဆိုတာ ဖြေကြားချင်ပါတယ်။

Crd
လယ်ယာမြေပြဿနာ (ဥပဒေရေးရာ အမေးအဖြေ) မြေယာဥပဒေနှင့်မြေယာစီမံခန့်ခွဲရေး လုပ်ထုံးလုပ်နည်းများ အတိုင်ပင်ခံ ဆရာဦးဇော်မင်းကို ဒီဗွီဘီသတင်းဌာနမှ နေရီရီက တွေ့ဆုံမေးမြန်း။
DVB မှ ကူးယူတင်ပြပါသည်။ By DVB 4 March 2019 Print Email

 လှိုင်ဘွား (လယ်ယာမြေ)